!ایک باب زندگی ایک سفر

'بی بی عبدیہ سے عابدہ رحمانی تک' نام میں کیا رکھا ہے؟

جب سے ہوش سنبھالا تھا اپنے آپ کو بی  بی  عبدیہ، عبدیہ اور عبدیے پکارتے سنا -بے بے اور گل داجی ( امی اور ابا )عبدیے پکارتے ، جب کبھی ڈانٹ     اور غصے میں ہوتے تھے تو یے کو تھوڑا لمبا اور موٹا  کر لیتے تھے ،محبت کے جذبات میں یے نرم اور پیار بھرا ہو جاتا تھا - 

بڑے بوڑھے ملازم وغیرہ بی بی عبدیہ  پکارتے -یہ نام پورے گاؤں  اور علاقے میں انوکھا تھا یعنی کسی اور کا نہیں تھا -           

جب میں پیدا ہوئی تو میری دادی کی پسند کے مطابق میرا  نام بی  بی  عبدیہ رکھا گیا میری والدہ کے مطابق ایک عراقی خاتوں ہمارے گھر آئی تھیں انکا یہی نام تھا اور دادی جان  کو اتنا پسند آیا کہ انہوں نے فیصلہ کر لیا کہ اگر پوتی ہوئی تو وہ یہی نام رکھیںگی  اور یوں    میرا  یہ نام ہوا - اس نام میں کوئی قباحت نہیں تھی اور مجہے کافی پسند بھی تھا نہ صرف اس لیے کہ یہ میرا اپنا نام تھا بلکہ اس کے معنی بھی اچھے تھے عبدیہ ' یعنی اسکی بندگی کرنے والی،کسکی اللہ تعالی کی'--  

پھر زندگی کا ایک اور دور آیا ، کچھ رشتہ دار مجہے ہدیہ بولنے     لگے اور زیادہ تر عابدہ ، اسکول میں بھی زیادہ تر عابدہ پکارا جاتا تو نامعلوم کس طرح 

یہ فیصلہ ہوا کہ اسکول میں  نام" بی بی  عابدہ" ہوگیا -اس وقت نو خیزی کا زمانہ تھا بی بی کچھ دقیا نوسی معلوم ہوا کلاس میں ایک اور عابدہ بھی  تھی تو میں اپنے والد کے نام کے ساتھ عابدہ قاسم کھلانے لگی -اگرچے گھر میں ابھی بھی عبدیہ تھی لیکن  اسکول  میں عابدہ ----معنی دونوں ناموں کے ایک ہیں-

شادی کے بعد سرکاری طور پر شوہر کا پہلا نام احد لگا لیا اور عابدہ احد ہو گئی کچھ عرصے کے بعد آخری بھی لگالیا اور بہت سارے کاغذات میں عابدہ احد رحمانی ہو گئی -

شادی کے بعد پہلے تو یہ ہوا کھ میرے شوہر کو میرے والدین کے پکارنے کا انداز عبدیے بہت اچھا لگا - اور وہ کافی عرصے تک مجھے عبدیے پکارتے رہے   -    

بالاخر نام کو مختصر کر کے عابدہ رحمانی کر لیا اب سرکاری طور پر اور عام طور پر یہی نام استعمال ہوتا ہے اگر چہ میرے پرانے اور گاؤں کے رشتہ دار مجھے اب بھی عبدیہ اور بی بی عبدیہ کہتے ہیں اور حیران ہوتے ہیں کھ یہ عابدہ رحمانی کون ہے ؟در اصل یہ کتاب انکے لیے بھی ہے اس لیے میں نے اپنا اصلی نام بھی  استعمال کیا ہے - دیار غیر تو میں نہیں کہونگی (کیوں کہ اب یہ اپنا ٹھکانہ ہی ہے اور غالبا مدفن بھی ہو!) میں عابدہ کو عبیدہ پکارتے ہیں رحمانی کو رامانی ، بقول شکسپیر گلاب تو گلاب ہے چاہے کسی نام سے پکارو --لیکن نام کی اہمیت ہے اور مجھے اپنا پرانا نام پھر سے اچھا لگتا   ہے - --------     

اب رحمانی کی وجہ تسمیہ بھی بتا دوں کہ یہ میرے نام کا آخری حصہ کیسے بنا - میرے مرحوم شوہر کا اصلی نام عبدل احد خان تھا اور والد کا نام عبدالرحمن خان تھا یہ لوگ لکھنو کے پٹھان تھے اور آخری نام خان ضرور لگاتےہیں،شجرہ پٹھانوں کے قبیلے یوسف زئی سے ملتا ہے اسی قبیلے سے 

میرا یعنی میرے ابا و اجدا کا تعلق ہے اگر چھ ہم انکو بناسپتی پٹھان کہتے ہیں -- عبدل احد خان کے ساتھ معاملہ کچھ الٹا ہوا میٹرک تک تو انکا یہی نام تھا اگر چہ احد پکارے جاتے تھے -کالج میں اردو ادب کے دلدادہ ہوۓ بلکہ اس وقت کے مشہور ادبی رسائل میں لکھنا شروع کیا ، جو انہوں نے احد رحمانی کے نام سےشائع کۓ نام میں غنائیت   پیدا کرنے کے لۓرحمان سے رحمانی ہو گۓ ،بعد میںیہ نام اتنا بھا یا کہ سرکاری طور پر اپنا نام یہی کر لیا     باقی

خاندان کے نام میں خان ہے بچوں کے نام میں خاص طور پر خان لگا دیا تھا، جب کہ رحمانی میرا لاحقہ بن گیا -بعض لوگ مجھے ایک حلقہ ارادت سے سمجھتے ھیں ،حالانکہ  حقیقت اس کے بر عکس ہے- ---